| | BULEGHIN barcarolo e BETTINA |
| |
| | Buleghin |
| | Cosa dirastu mai Bettina cara? |
| | Che tardi son vegnuo a retrovarte; |
| | za me feguro |
| | de vederla instizzada, |
| 5 | rabbiosa co è una chizza, |
| | buttar le bave, come fa un serpente, |
| | e dir ch’ella de mi no pensa gnente. |
| | Ah ziogo maledetto! |
| | Ti xe la mia rovina, te cognosso |
| 10 | né posso star senza le carte adosso. |
| | Per esser stà fin desso |
| | al ziogo de bassetta, ho perso i bezzi |
| | e desgustà Bettina poveretta. |
| |
| | Sento el ziogo che me chiama |
| 15 | e Bettina che me brama |
| | né so a chi abbia da badar, |
| |
| | per un sento gran tormento |
| | e per l’altra gh’ho contento, |
| | gramo mi cos’hoi da far. |
| |
| 20 | Ma pur bisogna |
| | sforzarse e far coraggio, |
| | soffrir con pase i so schiamazzi |
| | e lassarla criar quanto ghe piase, |
| | che alfin dopo i crior se fa la pase. |
| | Bettina |
| 25 | Certo che a una bell’ora |
| | a vederme vegnì sier mandolato; |
| | credea che int’el caligo |
| | ve fussi perso o descolà int’el giazzo. |
| | Al certo gran facende, |
| 30 | gran ziri e gran negozi |
| | bisogna che gh’abbié in sta cittae; |
| | de mi no ve curé, za me n’accorzo; |
| | vu gh’avé troppi impegni... |
| | Per no dir troppo taso |
| 35 | ma credi Buleghin che la gh’ho al naso. |
| | Buleghin |
| | Me stupiva da seno in veritae |
| | che gh’avesse una volta el gran contento |
| | de trovarte in bonazza; |
| | ma d’ognora ti xe co fa una bissa |
| 40 | e ti butti le bave co è una chizza. |
| | Bettina |
| | Sier frascon senz’inzegno, |
| | za che volé che diga, |
| | no gh’hoi forse rason de lamentarme |
| | o pensé che no sappia |
| 45 | la vita che tegnì e zorno e notte; |
| | so che in tutti i cantoni |
| | volé far da galante |
| | con qualche paronzina; |
| | l’altro dì mi ho savesto |
| 50 | che favi el cicisbeo |
| | a Checa fia de Catte lavandera; |
| | l’avé menada ai freschi e in verso sera |
| | che ghe facevi drio el cascamorto |
| | e po avé marendà con ella in orto. |
| | Buleghin |
| 55 | Chi t’ha dito ste chiarle, cara matta? |
| | Me maravegio ben che ti ghe badi; |
| | ma se posso saver chi xe sta lengua |
| | che de panchiane te vien a stornir, |
| | co un pistolese mi lo voi sbasir. |
| | Bettina |
| 60 | Che caro sier gradasso inanemao |
| | che tutti vuol mazzar quando che i dise |
| | la veritae che xe schietta e real |
| | ma alla fin po resté co fa un cocal. |
| |
| | Vardé là che bambozetto, |
| 65 | scartozetto, |
| | che vuol tutti spaventar! |
| |
| | Ma col sente un po’ de zente |
| | la corrente |
| | el xe el primo a tacchizar. |
| |
| | Buleghin |
| 70 | No se femo nasar Bettina cara; |
| | né me far la zelosa se stavolta |
| | son vegnù troppo tardi a visitarte. |
| | Ti sa viscere care |
| | quanto che t’amo; né altra donna |
| 75 | gh’averò mai int’el cuor |
| | che ti anema mia, raise care. |
| | Donca no me far più la sdegnosetta; |
| | guarda el to Buleghin, batti la lana |
| | o che me mazzo al sanguenin de Diana. |
| | Bettina |
| 80 | Donca se no te vardo ti è ressolto |
| | de volerte mazzar in mia presenza? |
| | Frascon, mi no te credo in mia conscienza. (Finge partire) |
| | Buleghin |
| | Ferma Bettina cara no andar via |
| | o fazzo del mio cuor una beccaria. (Vuol ferirsi) |
| | Bettina |
| 85 | Distu da senno o fastu una mattada? |
| | O qua me vustu far una frittada? |
| | Buleghin |
| | No fazzo né frittada né sguazzetto |
| | ma voi cavarme el cuor che gh’ho int’el petto. (Vuol ferirsi) |
| | Bettina |
| | E sta’ savio buffon, vivi anca un poco |
| 90 | né volerme lassar pezzo d’alocco. |
| | Buleghin |
| | Vivrò za che ti ’l vuol cara Bettina, |
| | vivrò come te piase |
| | ma con patto mio cuor che femo pase. |
| | Bettina |
| | Femo pase sì sì, mi te l’accordo |
| 95 | ma con questo però che da qua avanti |
| | ti lassi andar i vizi. |
| | All’ostaria no voi che ti ghe vaghi, |
| | che no ti vardi più nissuna donna; |
| | voi che ti lassi el ziogo de bassetta |
| 100 | che un zorno me farave poveretta. |
| | Buleghin |
| | Ogni trista memoria ormai se tasa |
| | e se ponga in obrio le andate cose, |
| | m’insegna a dir cusì Torquato Tasso, |
| | t’obbedirò Bettina a cao basso. |
| | Bettina |
| |
| 105 | Ti ha inteso el mio patto, |
| | sta’ fermo, sta’ saldo. |
| |
| | Buleghin |
| |
| | Con tutto sto caldo |
| | te vuoi sodisfar. |
| |
| | Bettina |
| |
| | Sta’ forte in cervello. |
| |
| | Buleghin |
| |
| 110 | Te zuro costanza. |
| |
| | Bettina |
| |
| | Se un zorno in sostanza... |
| |
| | Buleghin |
| |
| | Vorem solazar. |
| |
| | a due |
| |
| | Vorem solazar. |
| |
| | Fine del primo intermezzo |
| |
| |
| |
| |
| |
contatti: 