LA BOTTEGA DA CAFÈ
Intermezzo per musica da rappresentarsi nel teatro Grimani di San Samuele
l'autunno dell'anno 1736.
In Venezia, MDCCXXXVI, appresso Alvise Valvasense, con licenza de' superiori.
PERSONAGGI
NARCISO caffettiere accorto
ZANETTO veneziano, figlio di mercante
DORILLA venturiera romana
PARTE PRIMA
NARCISO in bottega, garzoni, poi Dorilla e Zanetto
Narciso
Anemo spiritosi,
disinvolti, graziosi,
che per spazzar la nostra mercanzia
sora tutto ghe vuol galantaria.
Via brusé quel caffè, metteghe drento
quattro grani de fava
e acciò ch'el para fresco
metteghe una porzion d'orzo todesco.
Per burlar i golosi
che impenisse de zucchero la tazza
bisogna ogni mattina
el zuccaro misciar colla farina.
Chi no fasse cusì no viverave;
tanto fitto de casa e de bottega,
mobili, capital, garzoni e lumi
xe una spesa bestial; ma questo è 'l manco.
Per sticcarla coi altri,
vestir in gala e goder dei pacchietti,
ghe vol dei gran caffè, dei gran trairetti.
Se no fusse, gramazzi,
la protezzion de certe paronzine,
che in bottega ne fa conversazion,
anderessimo tutti a tombolon.
Ma ghe ne xe qua una; allegramente
in poco tempo impenirò i squelotti.
Ghe vuol zoette a trapolar merlotti.
(Vien Dorilla mascherata e siede senza parlare)
Maschera ghe son servo.
Dorilla
Amico addio.
Narciso
(Amico addio? Questa xe forestiera).
Possio servirla?
Dorilla
Io son un poco stanca,
se non sdegnate riposar vorrei.
Narciso
(Compita in veritae).
Patrona, in sto paese
ella farà delle facende assae.
Dorilla
Come sarebbe a dir?
(Alterata)
Narciso
La me perdona,
no vorave fallar, sotto la maschera
no se sa chi ghe sia; mi parlo a caso,
peraltro in ste botteghe
certe persone se cognosse a naso.
Dorilla
Mi piace il vostro umor.
Narciso
Eh via che cade!
Parlemose alla schietta;
ella xe forestiera e no la sa
l'usanza del paese.
Dorilla
È questa appunto
la prima volta che Venezia io vedo.
Narciso
Da che paese xela?
Dorilla
Io son romana.
Narciso
Int'el parlar l'ho cognossua perdiana.
Dorilla
(Mi sembra il caffettier fatto a mio genio).
Narciso
Za che no gh'è nissun, se poderave
ricever un favor?
Dorilla
Sì, comandate.
Narciso
La se cava la maschera, la lassa
che la veda int'el viso.
Dorilla
Eccomi pronta.
(Si smaschera)
Narciso
(Oh che babio da re, che bel musotto!
O che occhietto baron! Son mezzo cotto).
Dorilla
Che dite fra di voi? Rassembro forse
agli occhi vostri odiosa?
Narciso
Vu me paré una riosa
dal zardin de Cupido traspiantada;
non ho visto nissuna
bella come sé vu; faré fortuna.
Dorilla
Ma sappiate ch'io son femina onesta.
Narciso
Ben, ben, cusì me piase.
Se vien qualche polastro,
se procura pelarlo
e po con bella rasa
un pretesto se tiol per impiantarlo.
Vederé vegnirve attorno
più de vinti amanti al zorno.
Qualchedun suspirerà;
nol vardé, che l'è spiantà.
Se qualcun ve vien arente,
fé da savia e da prudente;
ma co vien el generoso
sia pietoso el vostro cuor.
Quel che i dona se receve,
fin che i sta come se deve
ma se i vuol slongar le man
se ghe scampa da lontan
e i se lassa col brusor.
Dorilla
Ma il desiderio mio
saria di maritarmi
né in tal guisa vorrei pregiudicarmi.
Narciso
Se volé maridarve
con un omo da ben, no sta mi a dirlo,
ma de megio trovar no poderessi,
son zovene onorato... Oh se volessi...
Dorilla
Io son contenta ma...
Narciso
Che ma?
Dorilla
Di dote
son sproveduta affatto.
Narciso
Val più quel vostro tratto,
val più quei vostri occhietti bagolini
che no val un sacchetto de zecchini.
Ve torò senza gnente ma per far
quel che bisogna in casa, con maniera
fin che sé forestiera,
col benefizio della mascheretta
poderessi avanzar qualche cossetta.
Ma intendemose ben, onestamente;
e po no dubité
che alle occasion ve starò sempre arrente.
Dorilla
Farò quel che volete.
Ma qui vien gente, io mi ricopro il volto.
Narciso
Fé ben; quel che vedé
xe un certo sior Zanetto,
fio de un mercante ricco; el fa con tutte
el cascamorto, el spende generoso,
el fa da vertuoso
ma l'è un ignorantazzo;
podé pelarlo e torvene solazzo.
Zanetto
Putti cafè.
Narciso
Lustrissimo la servo.
Zanetto
Famelo a posta.
Narciso
Giusto adesso el fava.
Zanetto
Digo ch'el voggio apposta, m'hastu inteso?
Narciso
Lustrissimo siorsì. (Ghe voggio dar
per ste so cargadure
tutte le scolaure).
(Va per il caffè)
Zanetto
Patrona siora maschera, la diga,
comandela cafè? Eh via no femo
cerimonie. Narciso?
Narciso
Son qua lesto.
Zanetto
Falo per do.
Narciso
La servo presto, presto.
Zanetto
Via maschereta, no fé la retrosa,
caveve la moretta;
za no ghe xe nissun. Eh eh patrona.
(Scherzoso)
La compatisso, no la me cognosce.
Qua gh'è dei zecchinatti
(Mostra la borsa)
e colle donne son el re dei matti.
Eh via no la se fazza sfregolar.
Vardé che bella vita!
(Li alza il zendal. Dorilla lo rispinge)
Oh oh che smorfie!
Presto presto el cafè, che voggio andar.
Narciso
Strissimo sior Zanetto.
Zanetto
Cosa vustu?
Narciso
Quella maschera là mi la cognosso,
la xe una vertuosa
vegnua da Roma, oh oh, se la vedesse!
La xe graziosa e bella
che la par una stella.
Zanetto
La sa star sulle soe.
Narciso
No l'è più stada
in sto paese e no la sa l'usanza,
con una forestiera
ghe vuol, la me perdona, altra maniera.
Zanetto
Caro Narciso dighe le parole,
parleghe come ti, fora dei denti,
mi intanto studierò do complimenti.
Narciso
Lustrissimo la vuol
donca che mi ghe batta el canariol?
Zanetto
Oh che matto! Oh che matto! Ti me piasi,
tiò sto ducato, fa' pulito e tasi.
Narciso
(Adesso ti sta fresco). Oe paronzina,
mi za l'ho messo a segno,
desmaschereve e doperé l'inzegno.
(A Dorilla)
Dorilla
Ma non vorrei...
Narciso
Eh non abbié paura;
se 'l ve perde el respetto
mi ve defenderò.
(Come sopra)
Dorilla
Con questo patto
la maschera mi levo.
(A Narciso)
Narciso
El colpo è fatto.
(A Zanetto)
La xe desmascherada,
via la ghe daga una benigna occhiada.
Zanetto
Che l'aspetta un momento;
no me xe vegnù ancora el complimento.
Narciso
La parla natural.
Zanetto
Me maraveggio!
So ben complimentar; son stà in colleggio.
Madama io mi dispiace
(A Dorilla)
che i rai di vostra face
m'hanno sotto la maschera del volto
nella base del seno il cor sconvolto.
(Affettato)
Dorilla
Riverito signore...
Zanetto
La me lassa fenir. Dunque per questo
consiacosaché vermiglia bocca,
(Va mendicando complimenti)
negando voci ehem... negando voci
ehem... negando voci a recchia amante
incantato restai.
Qual ostrica nel fango, io m'impiantai.
Dorilla
Che discorso gentil!
Zanetto
Io sono avezzo
tanto a parlar toscano
che appunto sembro nato a Toscolano.
Narciso
Lustrissimo patron xe qua el caffè.
Zanetto
Vorla zuccaro assae?
(A Dorilla)
Dorilla
Poco, pochissimo.
Zanetto
El dolze fa dormir; lei fa benissimo.
Dorilla
Il dolce fa dormir?
Zanetto
Sì mia signora.
El corrompe le flemme,
el digerisce el chilo,
l'interna l'individuo,
el disolve del cerebro i escrementi...
Via, via, la beva senza complimenti.
Dorilla
Lei è molto intendente.
Narciso
(Oh che gran frotole!)
Zanetto
Ho studiato Aristotile,
l'Almanaco perpetuo ed il Meschino,
Cacassenno, Bertoldo e Bertoldino.
Oh gran caffè. Cosa ghe par? È buono?
Dorilla
Prezioso in verità.
Zanetto
Questo vol dir
saverse far servir; altri che mi
nol beve in sta maniera.
Narciso
(Questo è 'l caffè che xe avanzà gersera).
Zanetto
Via Narciso da' liogo.
(A Narciso piano)
Narciso
Eh no la dubita;
so el mio dover. (Ma voggio veder tutto,
perché mi non voria ch'el sior Zanetto
me levasse de man sto bel tochetto).
(Si ritira)
Zanetto
Sentemose un tantin. Ah mia patrona.
(Siedono)
Quell'occhio fulminante
m'ha fulminato il cor sino alle piante.
Dorilla
Lei vuol meco scherzar.
Zanetto
Dico da senno.
Quel volto vermigliato,
quel ciglio rabuffato...
(Accostandosi)
Dorilla
Eh mio signore,
un po' più di modestia.
(Lo rispinge)
Zanetto
Eh via la tasa.
Dorilla
Vussignoria tenga le mani a casa.
Zanetto
Ho caminato il mondo,
(S'alza con furia)
son stato a Chioza, a Padoa ed a Vicenza,
ho girato la marca trevisana,
non ho trovato mai donna sì strana.
Me vien suso un certo caldo
che non posso più star saldo.
(Agitato)
La la ran la, la la ran ran.
Sé bella patrona.
Ma sié mo anca bona.
Occhietto furbetto,
bocchetta vezzosa,
no posso più star.
Dorilla
(Costui va su le furie,
conviene usar prudenza ed acquietarlo).
Vinta da queste sue belle maniere,
dal suo tratto gentil, dal suo bel vezzo,
già mi sento nel petto
nascer per lei un rispettoso affetto.
Zanetto
Oh cusì me piasé!
La me daga la man.
(Torna a sedere)
Dorilla
Eccola pronta.
Zanetto
Eh la se cava i guanti.
Narciso
(El complimento pol andar più avanti).
Lustrissimo patron, se la comanda
gh'ho una chiave de palco.
Zanetto
No me romper la testa.
Dorilla
D'opera o di comedia?
Zanetto
Così come dixeva...
(A Dorilla)
Narciso
La xe una novità piena de chiasso,
con certa confusion d'omini e bestie
che doverave far un gran fracasso.
Dorilla
Ditemi...
(A Narciso)
Zanetto
Via quel guanto.
(A Dorilla)
Dorilla
Ditemi, avranno esposto un bel cartello?
Narciso
L'è bello assae. Colle figure intiere
e tra le altre cose pelegrine
parole ghe xe su scritte latine.
Dorilla
La vedrei volentieri.
(A Zanetto)
Zanetto
Co se tratta
de servir el so genio
donca la tiogo; dime, quanto vienla?
(Prende la chiave)
Narciso
No i vuol un bezzo manco
de sie zecchini.
Zanetto
Come! Xestu matto?
In terz'ordine in banda e sie zecchini?
Narciso
Quando no la la vol, la tiogo indrio.
Zanetto
Sti torti ad un par mio?
Tiò sie zecchini e se no basta questi,
te ne darò dei altri
ma con un cortesan della mia sorte
no far de ste bulae. Patrona bella
sta borsa che xe qua tutta è per ella.
Dorilla
Signor mi meraviglio
che lei parli in tal guisa a una mia pari.
Non si offrono denari
a una donna civil come son io.
Zanetto
Quando la xe cusì
metto via la mia borsa e torno indrio.
Narciso
Che diavolo aveu fatto?
(A Dorilla piano)
Dorilla
(Eh non temete).
Finché mi avesse offerto
(A Zanetto)
un anel di diamanti, un orologio,
una scatola d'oro o cosa tale,
accettato averei il cerimoniale;
ma offerirmi denari!
Gli dimando perdono,
donna di tale affare io già non sono.
Signor mio, v'è un gran divario,
mercenario non ho il core,
so far caso d'un favore
se nol veggo interessato,
al mercato
vada lei se vuol comprar.
Per un guardo, per un vezzo,
certo prezzo non pretendo,
la mia grazia altrui non vendo,
quello sol può incatenarmi
che d'amarmi
nobilmente sa mostrar.
Narciso
Lustrissimo patron halla ascoltà
che maniera gentil!
Zanetto
La m'ha copà.
Narciso
Mi gh'ho paura che la sia istizada.
Zanetto
Come se poderave
farghe passar la colera?
Narciso
Mi ghe dirò. Ghe vuol un regaletto
fatto con bona grazia.
Zanetto
Co sto anello
faremio gnente?
Narciso
Sì, l'è bon e bello.
Zanetto
Come ghe l'hoi da dar?
Narciso
La gh'el presenta
con un dei so graziosi complimenti.
Zanetto
E si no la lo vuol?
Narciso
M'impegno mi
de far che la lo tioga.
Zanetto
Caro Narciso, me confido in ti.
Signora, posciaché di sdegno accesa
(A Dorilla)
sublimaste la bile
chiede grazia e perdon Zanetto umile.
Narciso
Inzenochieve.
(A Zanetto che s'inginocchia)
Dorilla
Compatisco in lei
l'ignoranza ch'ella ha de' fatti miei.
Zanetto
Narciso cosa distu?
(S'alza)
Dell'ignorante la m'ha dà alla prima.
Narciso
Ghe vuol pazienza e batterla pulito.
Moleghe un pochettin, che za l'è ito.
(A Dorilla)
Zanetto
Ma se lei vuol struccare
con torcolo di sdegno il core afflitto,
funesto e derelitto
da inferno Averno biscottato io sono.
Dorilla
Su via, per questa volta io gli perdono.
Zanetto
Voria ma non ardisco...
Dorilla
E che vorrebbe mai?
Zanetto
Darghe...
Dorilla
Che cosa?
(Adirata)
Zanetto
Gnente, gnente patrona.
Narciso
El vuol donarve
un anel de diamanti.
(A Dorilla piano)
Dorilla
Dica, che mi vuol dar?
(Placida)
Zanetto
Gnente dasseno.
Dorilla
Adunque mi burlò.
(Sdegnata)
Zanetto
No ma voleva...
Dorilla
Che cosa?
Zanetto
Dillo ti caro fradello.
(A Narciso)
Narciso
El ghe voleva dar un bel anello.
Dorilla
E mi crede cotanto
indiscreta e incivil ch'io non l'accetti?
Zanetto
Mi gh'aveva timor... Ma se son degno
de tanto onor, la toga, so peraltro
che questo monumento
non è proporzionato al suo splendore.
Dorilla
Io non apprezzo il don ma il donatore.
Zanetto
Za che fatta xe la pase,
anderemo se ghe piase
al teatro tutti do.
Narciso
(Che dolori, oimei, oimei).
Dorilla
Volentieri venirò
ma vorrei...
Zanetto
Dixé su caro bel viso.
Dorilla
Che venisse ancor Narciso.
Narciso
(Via respiro).
Zanetto
Manco mal;
ti ne porterà el feral.
Narciso
A Narciso dal caffè
se ghe fa sta esibizion?
Dorilla
Che vergogna.
Narciso
Cospetton.
Zanetto
Xestu matto?
Narciso
Cospetton.
Zanetto
Eh via tasi.
Narciso
Cospetton.
De vegnirghe no me importa.
Dorilla
Io lo voglio.
Zanetto
Ti è paron de palco e porta.
Orsù via la staga zitta.
Dorilla
Nel palchetto
vuo' ch'egli abbia la man dritta.
Zanetto
Questo è troppo.
Narciso
Cos'è stà?
Dorilla
Io lo voglio.
Zanetto
El l'averà.
E po doppo la comedia
anderemo all'osteria.
Dorilla
Dove vuol vussignoria.
Narciso
Che dolori, oimei, oimei.
Dorilla
Ma vorrei...
Zanetto
Comandé caro bel viso.
Dorilla
Che venisse ancor Narciso.
Narciso
Brava, brava.
Zanetto
El vegnirà.
a tre
El mio cuor giubilerà.
Fine della prima parte
PARTE SECONDA
Camera da gioco.
NARCISO, poi ZANETTO, poi DORILLA
Narciso
Tita, Nane, fé presto,
forbì sti taolini,
parecchié le candele, i ziogadori
quando tegniré netto
sempre i ve donerà qualche trairetto.
Se vegnisse in bottega
qualche fiol de famegia, andé a avisar
quel tal, se me intendé. Quello xe un omo
che per missiar le carte el val un mondo.
Quando certi polastri ghe va sotto
el ghe dà la pelada come va;
si ben gh'ho el mio vadagno,
pur qualche volta i me fa peccà.
No trova quiete
in nissun liogo
quel che gh'ha el ziogo.
Chi gh'ha sto vizio
va in precipizio.
Credo che el diavolo
l'abbia inventà.
Co se vadagna,
tutto se magna
e co se perde
se resta al verde,
el ricco povero
presto se fa.
No se vede gnancora el sior Zanetto!
L'è stà tutta giarsera
con quella forestiera,
l'ha speso tanti bezzi, o che baban!
E nol gh'ha mai toccà gnanca una man.
Quella sa el so mestier;
basta, certo la voi per mia mugier
e se... Ma velo qua.
Zanetto
Oe, Narciso, hastu visto
gnancora quell'amiga?
Narciso
Lustrissimo sior no.
Zanetto
La m'ha pur ditto
de vegnir a bonora,
sangue de mi, no l'è vegnua gnancora?
Narciso
No xe mezza mattina,
l'è andada in letto tardi,
la vegnirà.
Zanetto
Sì sì, ti gh'ha rason.
Cosa distu, che muso?
Narciso
Digo che se gh'avesse
un milion de zecchini
li vorave impiegar tutti per ella.
Mi non ho visto mai donna più bella.
Zanetto
Bezzi ghe n'ho pochetti
ma farò dei stocchetti,
svaliserò mio pare,
romperò el scrigno e roberò le doppie
e se no le bastasse
porterò via le zogie
e svoderò le casse.
Narciso
Certo che al dì d'ancuo
chi vol star colle donne
ghe vuol dei bezzi assae.
Zanetto
Li spenderò a palae;
tutta la mia legitima
voi donar a custia.
Narciso
(Anca mi goderò la parte mia).
Zanetto
E mai la vien! Oh poveretto mi,
no posso più star saldo,
varda caro Narciso...
Ma no varderò mi...
Ma sarà meggio che ti vardi ti.
Narciso
Vago a vardar, se intanto
la se vol devertir
mi ghe darò da lezer i foggetti.
Zanetto
Sì sì, quel che ti vuol.
Narciso
I xe de quelli
vegnui sta settemana
col corrier de Milan.
Zanetto
Sangue de Diana!
Tanto lontan? Dameli, va' in bottega;
e torna, che t'aspetto.
Narciso
(Che caro sior Zanetto!)
(Va in bottega)
Zanetto
Londra... Coss'è sta Londra? Ella una donna?
O xelo qualche pesce?
Ma Dorilla no vien... Madrid. Madrid?
Sì sì, adesso l'intendo,
Londra e Madrid sarà mario e mugier.
Un matrimonio certo
el sarà de gran stima,
oh gran mi per capir tutto alla prima.
Narciso, ella vegnua?
Narciso
Stissimo no.
(Di dentro)
Zanetto
Che pacienza che gh'ho!
Donca Londra e Madrid; voggio vardar
se i ha serà el contratto.
«La corte si è partita per campagna...»
Oh che spropositazzo!
La corte colle gambe, oh che strambazzo!
Narciso.
Narciso
La comanda.
(Fuori)
Zanetto
Ella vegnua?
Narciso
Stissimo no.
Zanetto
(Che mamera monzua!)
Genua. Coss'è sta Genua?
Narciso
Una città.
Zanetto
«Sono arrivate in porto
quatro navi di Spagna». In che maniera?
Come vale le nave in quel paese?
Narciso
Per mar come a Venezia.
Zanetto
Ghe xe dell'altro mar?
Gh'è delle nave fora de Venezia?
Narciso
Lustrissimo siorsì.
Zanetto
Mi no lo credo,
ti me la vuol pettar.
Mo varda se la vien.
Narciso
Torno a vardar.
(Si ritira)
Zanetto
Venezia. Oh voi sentir se ghe xe suso
el ponte da Rialto;
«Due bastimenti inglesi han preso porto».
Prender vol dir chiappar; oh che faloppa!
Do bastimenti soli
averà chiappà un porto? «Eran diretti...»
Narciso
Vela qua che la vien.
(Fuori)
Zanetto
Tiò i to foggietti.
(S'alza con furia)
Dorilla
Riverente m'inchino...
Zanetto
Oh benvegnuda!
Xe giusto quatro orette
(Alterato)
che la stago aspettar.
Dorilla
(Bel complimento!)
Narciso
Questa no xe la forma
de farse voler ben.
(A Zanetto)
Zanetto
Ti gh'ha rason.
Mia cara paronzina,
me par che stamatina
la gh'abbia bona ciera,
stala ben volentiera?
Dorilla
S'io son nella sua grazia, io sto benissimo.
Zanetto
Oh cosa che la dise! La mia grazia
la xe tutta per ella.
Narciso
(La so grazia vuol dir la so scarsella).
Zanetto
Narciso va' in bottega.
Narciso
Vorla niente?
Zanetto
Dame un mazo de carte.
Narciso
Eccole qua.
Zanetto
Via lasseme ziogar con libertà.
Narciso
Vago via (ma per poco,
se el crede de star solo, el xe un aloco).
(Si ritira)
Zanetto
Cara siora Dorilla
cosa m'halla mai fatto,
doppo che la cognosso
no gh'ho un'ora de pase; e zorno e notte
e co magno e co bevo e fin co dormo,
sempre co la mia mente,
si ben che son lontan, ghe stago arente.
Quando a tola son sentà,
digo: «O ciel fussela qua,
sto boccon saria per ella,
questo qua saria per mi»
e cussì
quando bevo digo ancora:
«Ghe darave a quel bocchin
mezzo gotto de sto vin».
Quando, o ciel, sarà quel dì!
Dorilla
Stupisco nel sentirmi
senza merto verun cotanto amata.
Zanetto
Mo chi mai poderave
far de manco d'amarla?
Quel viso delicato,
quel vezzo che innamora...
(S'accosta)
Narciso
M'halla forsi chiamà?
(Fuori)
Zanetto
No, va' in malora.
Narciso
(Se stava ancora un poco!)
(Si ritira)
Zanetto
Cusì come dixeva
me sento drento al cuor... La me perdona
se parlo venezian, el xe un linguaggio
che al toscano s'accosta
e per parlar d'amor l'è fatto apposta.
Dorilla
Il parlar veneziano
è cotanto gentile e delicato
che in tutto il mondo è sopra gl'altri amato.
Zanetto
Donca col cuor averto,
schietezza natural del mio paese,
ghe dirò quel che bramo.
Narciso
Lustrissimo son qua.
(Fuori)
Zanetto
Se no te chiamo
via lasseme ziogar.
Narciso
(Ti star furbo ma mi no minchionar).
(Si ritira)
Zanetto
Za so che la me intende
né gh'è bisogno che de più me spiega.
Dorilla
Signor posso accertarla
che intendere non so quel che non parla.
Zanetto
Orsù sta scatoletta
d'oro massizzo, lavorada in Franza,
ghe parlerà per mi, segondo usanza.
(Dà una scattola)
Dorilla
La scattola ricevo
e per risposta darli
io dunque aspetterò ch'essa mi parli.
Narciso
Stissimo sior Zanetto,
un certo zentilomo forestier
ha domandà de ella;
el l'aspetta in bottega del barbier.
Zanetto
Dighe che no ghe son.
Narciso
No gh'è più tempo,
el l'ha sentio in la ose
e mi gh'ho dito el vero.
Zanetto
Vaghe a dir che l'aspetta.
Narciso
El butta fuogo,
el dise: «Xe tre ore
che lo vago cercando
per darghe sti zecchini e nol se vede».
Zanetto
(Son int'un gran impegno).
La me aspetta un tantin, che adesso vegno.
(Via)
Narciso
Ho trovà sta invenzion
per far ch'el vaga via.
Dorilla
Bravo, bravissimo.
Narciso
Diseme vita mia,
cossa v'halo donà?
Dorilla
Mirate questa
scattola tutta d'oro.
Narciso
Consegnemela a mi, la liogherò
e quando la voré ve la darò.
Dorilla
Sì sì, prendete pure,
io non la voglio adosso.
Narciso
(Questa la sarà bona
per comprar tanto zucchero all'ingrosso).
Zanetto
Dove diavolo xe sto forestier?
(Torna)
Nol trovo in nissun liogo.
Narciso
El s'averà stuffà
e a far i fatti soi el sarà andà.
Zanetto
Me despiase dei bezzi; eh non importa.
Va' via ma senti ben,
se i vegnisse a portarme anca un milion
dighe che no ghe son.
Narciso
Ella sarà servida.
(Via)
Zanetto
La perdona
se l'ho fatta aspettar. Donca patrona,
per tornar sul proposito,
che risposta me dala?
Dorilla
Io non saprei
cosa dirle di più.
Zanetto
Sì sì, capisso.
A bon intenditor poche parole.
La vol dir con quel moto
che chi tase conferma. Anema mia
sarò tutto contento.
(S'accosta)
Narciso
Lustrissimo la servo.
Zanetto
(Oh che tormento!)
Narciso
Mo no m'halla chiamà?
Zanetto
No. (La va longa,
conosso el cortesan). Oe senti amigo
no se stemo a burlar, za te capisso.
Tiò sti sie zecchinatti,
godili, te li dono; ma te prego,
lasseme in libertà!
Sentime, se ti torni, te prometto
de ficcarte sta schienza in mezo al petto.
(Li mostra un stilo)
Narciso
Ringrazio vussustrissima
de sto cortese avviso.
Eh no son cusì matto,
tiogo i sie zecchinatti e me la batto.
(Narciso parla all'orecchio a Dorilla)
Zanetto
Oe, oe, cossa ghe distu?
Narciso
Domandava
se qualcossa da mi ghe bisognava.
(Via)
Dorilla
(Temo di qualche imbroglio).
Zanetto
(Gran drettoni
certo che xe costori!
Mi però son più furbo assae de lori.
Ma non voi buttar via st'ora preziosa).
Cara siora Dorilla
me sento drento el petto
un terribile ardor che me tormenta,
no la me sia crudel, via la me daga
un poco de conforto alla mia piaga.
Dorilla
Signor lei troppo presto
ad un recente mal cerca il rimedio;
certo vussignoria
l'arte di ben amar non sa qual sia.
Zanetto
Se la lizion xe presta
la me la insegna adesso.
Dorilla
Ascolti, è questa.
Un amante costante e fedele
pianger deve, soffrire e penare,
s'è la donna tiranna e crudele,
deve sempre servire e pregare
né mai chieder sfacciato così.
Nella scuola d'amor non precede
ad un lungo servir la mercede,
sol premiato è chi fido servì.
Zanetto
Questa, la me perdona,
in quanto a mi, xe una lizion minchiona.
Ho sofferto, ho servio tanto che basta;
no ghe xe più remedio,
pazientar più no posso,
me par d'aver cento demoni adosso.
Dorilla
La sua bestialità mi rende noia.
Colle donne civili
non si deve parlar in guisa tal.
Zanetto
Mi no so de civil o criminal.
Qua semo soli e voggio...
Maledetta fortuna, ecco un imbroggio.
(Vien Narciso mascherato)
Dorilla
(Sia ringraziato il cielo).
Zanetto
(In che maniera
m'hoggio da contegnir?)
Dorilla
(Chi mai sarà
questa maschera ardita!)
Zanetto
(Far el bravo voria ma gh'ho paura).
Narciso
(Oe non abbié spavento
perché mi son Narciso).
(A Dorilla piano)
Dorilla
(Oh che contento!)
Zanetto
(Ma questo mo xe troppo,
nol posso sopportar). Oe siora maschera
la prego in cortesia, la daga liogo.
Sta camera da ziogo
xe per mi reservada,
voi star con libertà, la voi serrada.
(Narciso ride)
Come patron, la ride?
Orsù la vaga a far i fatti soi,
la vaga cara ella,
se no, se no, la vederemo bella.
Narciso
La prego perdonar,
in verità che no ghe voggio andar.
(Nel naso)
Zanetto
Sior sgnanfo riverito
no me la fé montar.
Vedeu sto curarechie? Via vardelo,
mi della pelle ve farò un criello.
(Mostra il stilo)
Dorilla
(Oh per amor del cielo
non vi precipitate).
(A Narciso)
Narciso
(Eh no gh'è dubio).
(A Dorilla)
Donca patron la vol
sbusarme el ferariol?
Zanetto
(El gh'ha paura).
Siorsì, manco parole;
no la me varda storto.
Sanguenazzo de mi...
(Alza il stilo)
Narciso
Via, che ti è morto.
(Sfodera un palosso)
Zanetto
Aiuto, aiuto, aiuto.
Dorilla
(Oh che poltrone!)
Zanetto
La vita per pietà.
Narciso
Dame quel stilo.
Zanetto
La se lo tioga pur.
Narciso
Furbazzo infame.
Zanetto
Tutto quel che la vuol.
(Me preme de salvar el mio corbame).
Dorilla
(O che vigliacco
ch'è el sior Zanetto!)
Narciso
(Ghe ne xe cento
de so compagni).
Zanetto
Co sto spavento
me va l'affetto
per i calcagni.
Narciso
(Voi seguitarme
a devertir).
Dorilla, Zanetto
Dove sta cossa
vala a finir.
Narciso
Sior canapiolo,
scanasquelotti,
vogio trattarve
a scopelotti.
Zanetto
Questo xe troppo.
Narciso
Via, che te coppo.
Zanetto
Abié pietà.
(S'inginocchia)
Narciso
(Varé che porco).
Dorilla
(Che gran viltà).
Zanetto
Siora Dorilla
me raccomando,
l'amor xe grando
ma el timor cresce.
Dorilla
Ben mi rincresce
di non potervi
nulla giovar.
Zanetto
Vorla lassarme
donca mazzar?
Narciso
Tutte renonzia
sora sta donna
le to pretese.
Zanetto
Mi ve la lasso
senza contese.
Dorilla
Che bell'affetto!
(A Zanetto)
Zanetto
No, che l'è mia.
Narciso
Donca te sbuso.
Zanetto
Menila via.
Dorilla, Narciso
Che gran cucù!
Zanetto
Da la paura
no posso più.
Fine della seconda parte
PARTE TERZA
Camera da gioco, tavolino con lumi.
NARCISO, DORILLA e poi ZANETTO
Narciso
Cara man che me consola.
Dorilla
Cara pace del mio cor.
Narciso
Amerò sempre ti sola.
Dorilla
Tu sarai mio solo amor.
Narciso
Finalmente xe zonto
quel zorno benedio;
finalmente son pur vostro mario.
Dorilla
Giunto è quel dì beato,
in cui felice sorte
fa ch'io sia divenuta a voi consorte.
Narciso
Voi giusto che se amemo,
come fa do colombi,
ma no vogio però che se becchemo.
Dorilla
Sì sì, staremo in pace,
questo è quel che mi piace.
Narciso
Cara man che me consola.
Dorilla
Cara pace del mio cor.
Narciso
Amerò sempre ti sola.
Dorilla
Tu sarai mio solo amor.
Narciso
Ma gh'è zente in bottega,
lassé che voi vardar.
(Guarda)
Dorilla
Guardate pure.
Narciso
Sangue de mi! L'è giusto el sior Zanetto,
ghe voi far una burla
che nol tornerà più.
L'ha domandà ai garzoni si ghe sé,
i gh'ha dito de sì, el vien de suso,
presto, presto scondeve;
lasseme int'el intrigo,
vu sté in sto camerin, fin che vel digo.
Dorilla
Ancor questo farò per compiacervi.
(Si ritira)
Narciso
Oh la vol esser bella, mi me fido
perché sto sior Zanetto xe un pagiazzo
ma se 'l fusse de quei che digo mi
no farave de lu tanto strapazzo.
Zanetto
Oe Narciso, ghe xela?
Narciso
No la gh'è.
Zanetto
E via, che ti me burli.
Narciso
No da seno...
(Fa cenno che è nella camera)
Zanetto
Ah t'ho capio, vien qua; cosa vol dir?
Che! Xela forsi a licet?
Narciso
La xe mortificada
per el caso fatal de stamatina.
Zanetto
Mi che colpa ghe n'hoggio?
Ti ha visto che un baron (che nol me senta)
xe stà causa de quel inconveniente.
Narciso
E la ghe dise gnente?
Lassarghela in le man?
Tradirla, abbandonarla el primo zorno?
Questo xe vero amor?
Zanetto
Amor un corno.
Se non andava via per le mie drette,
con quel palosso el me taggiava a fette.
Narciso
E via la me perdona,
che no se fa cusì.
Zanetto
Come dovevio
contegnirme in quel caso?
Narciso
Prima morir che abbandonar la donna.
Zanetto
E mi mo te respondo,
più tosto che la vita
vaga pur quante donne ghe xe al mondo.
Narciso
Quel che la vuol, però quella patrona
no la intende cussì.
Zanetto
Caro Narciso
famela giustar ti. Via co sto patto
che se ti me l'agiusti,
mi te pago un tabarro de scarlatto.
Narciso
Un tabarro? Quaranta ducatelli
ghe vuol senza fattura.
Zanetto
So che ti xe perito,
(Le dà una borsa)
tiò i quaranta ducati e fa' pulito.
Narciso
Basta, m'inzegnerò.
Zanetto
Come farastu?
Narciso
Se la sarà crudel, barbara e fiera,
ghe dirò le parole in sta maniera.
Patrona, el sior Zanetto
xe qua tutto pentio,
per ella poveretto
l'è morto, l'è sbasio,
da senno el fa pietà.
E se la me responde:
«Nol voglio; vada via»,
dirò: «Patrona mia
l'è troppa crudeltà».
Zanetto
Bravo, bravo, m'impegno.
Narciso
La me aspetta un tantin, che adesso vegno.
(Via nel camerino)
Zanetto
Sento un gran batticuor! Tra la paura,
tra la vergogna e tra l'amor, me sento,
dirò co dise quello,
triplicato nel seno il mio tormento.
Vela qua che la vien.
Narciso
L'è persuasa
de lassarse vardar ma de parlarghe
certo no ghe xe caso. Co sto patto
vegnir la m'ha promesso.
Zanetto
Gnancora no la vien?
Narciso
La vien adesso.
Dorilla
Eccomi, c'intendiamo;
io non voglio ascoltar le sue parole.
Narciso
Sentela?
Zanetto
Ghe vorave
domandar perdonanza.
Narciso
Eh no gh'è caso;
ma se la se contenta
parlerò mi per ella sul so viso.
Zanetto
Me raccomando a ti, caro Narciso.
Narciso
Riverita patrona,
confessa el sior Zanetto
d'aver mancà con ella al so dover;
el dise che l'è un porco
pien de poltronaria...
Zanetto
No digo...
Narciso
Se parlé la scampa via.
El cognosce anca elo
che un aseno l'è stà...
Zanetto
No digo...
Narciso
Se parlé, la se ne va.
Zanetto
Dime caro Narciso,
che maniera xe questa de parlar?
Narciso
Con una donna offesa,
sti atti de umiltà bisogna usar.
Zanetto
Tutto sopporto in pase
pur che la me perdona.
Narciso
Via la diga patrona
qualcosa ancora ella.
Dorilla
Dirò ch'io lo conosco
per un uomo vigliacco e senza senno.
Per uno scimonito
che il trattare civil non sa qual sia.
Zanetto
Ma questo...
Narciso
Se parlé, la scampa via.
Dorilla
Dirò ch'egli non merta
l'affetto d'una donna, in tutto privo
di buona qualità...
Zanetto
Ma questo...
Narciso
Se parlé, la se ne va.
Zanetto
Ma cospetto de Bacco!
No poderghe parlar xe una gran pena;
e po m'ho da lassar
ancora strapazzar? Oh amor! Narciso.
Narciso
Lustrissimo.
Zanetto
Sì sì, dame dei titoli,
doppo d'averme titolà coi fiocchi.
Varda caro fradello,
gh'ho sto per de manini; se i ghe piase
di' che ghe i donerò, se femo pase.
Narciso
Basta, procurerò, la me li daga.
Oe muggier sti manini
(Piano a Dorilla)
i xe giusto approposito
per el vostro bisogno. El sior Zanetto
ve fa sto regaletto;
accettarlo bisogna ma convien
far che l'ultimo el sia.
Dorilla
Così va ben.
Narciso
Bisogna che finzé...
Zanetto
Xela giustada ancora?
Narciso
No aspetté.
Bisogna che finzé d'esser placada,
feghe qualche finezza
e quando che vedé...
Zanetto
Narciso, ella giustada?
Narciso
Mo aspetté.
E quando che vedé ch'el se ingaluzza,
trattegnilo a parole
fina che vegno mi con una burla
che za gh'ho parecchiada.
Zanetto
Narciso vala ben?
Narciso
La xe giustada.
Zanetto
Bravo, vien qua, che te voi dar un baso.
Narciso
Grazie al so bon amor.
Zanetto
Donca patrona,
(Dorilla le volta le spalle)
possio sperar che sia... Vardé che sesto,
la xe giustada e la me volta el cesto.
Narciso
Mi l'ho agiustada ma bisogna adesso
che ancora lu el la prega.
Zanetto
Ah! Sì xe vero.
Son qua... La mia vergogna...
Se l'amor che mi gh'ho... se la creanza...
la passion de dover... certo debotto...
No posso più parlar, che gh'ho el sangiotto.
Dorilla
Da questo suo parlar così interrotto,
dagl'occhi lacrimanti,
da quel ciglio umiliato io ben comprendo
il pentimento suo. Basta signore,
io già li ho perdonato,
tutto mi scordo e quel ch'è stato è stato.
Zanetto
Mi me sento tutto in lagreme
dal contento el cuor desfar.
Za cognosso el mio demerito,
no me posso consolar.
Narciso
Via no fifé, sté qua, ve lasso soli,
vago a far un servizio e adesso torno.
(Via)
Zanetto
(Magari che nol torna infin a zorno).
Siora Dorilla cara
certo so che ho fallà...
Dorilla
Via non parliamo
più di quel che è passato.
Zanetto
Ma se la me vedesse dentro al cuor
la vederia l'amor che gh'ho per ella.
Dorilla
Invano lei favella,
so ben quanto che mi ama.
Zanetto
Sì vita mia, sé la mia cara mama.
Ma no mama, la tata
ma gnanca tata, sé la mia morosa
dasseno ma sentì, gh'ho int'el pensier
che un zorno deventé la mia mugier.
Dorilla
(Sei venuto un po' tardi). Una gran sorte
certo per me sarebbe
divenir sua consorte
ma vedo che di me si prende spasso.
Zanetto
Sentì, ma che la staga tra de nu,
zuro de no sposar altri che vu.
Narciso
Oimè presto scondeve
oimè...
Zanetto
Cossa xe stà?
Narciso
Quel sbruffarisi.
Zanetto
Chi!
Narciso
Quel dai mustachi.
Zanetto
Oimè.
Narciso
Quel sgnanfo dal palosso.
Zanetto
Oimè no posso più.
Narciso, dove xelo?
Narciso
El vien de su.
Dorilla
(So che questa è una burla).
Zanetto
Cossa hoggio da far?
Narciso
Sconderse presto.
Zanetto
Dove, int'el camerin?
Narciso
No ghe xe chiave,
se el va drento el ve cata.
Zanetto
Mo via coss'hoi da far?
Gh'ho la morte alla gola.
Narciso
Che la se sconda qua sotto la tola.
Zanetto
Come?
Narciso
Ma presto.
Zanetto
E poi!
Narciso
Via, che debotto
quel mustachi xe qua.
Zanetto
Me ficco sotto.
(Va sotto la tavola)
Narciso
Oh che gran cargadura.
Dorilla
Si è scordato l'amor per la paura.
Narciso
Mio patron riverito
qua no ghe xe nissun. Me maraveggio
che la vegna con tanta inciviltae
a far in casa mia delle bulae.
Dorilla
Oh questa sì che è bella!
Narciso
Tasi, se no debotto
(Sgnanfo)
te scavezzo anca ti. Siora Dorilla
m'è stà ditto che qua ghe xe Zanetto,
se 'l gh'è voggio cavarghe el cuor dal petto.
Dorilla
Signor, certo mi creda
che qui alcuno non v'è.
Narciso
Come!
Dorilla
Lo giuro.
Narciso
Voggio andar a vardar per tutti i busi,
prima in sto camerin.
(Entra)
Zanetto
Siora Dorilla
me raccomando a ella.
Dorilla
Non temete,
della difesa mia certo voi siete.
Benché voi nol meritate
usar voglio carità.
Zanetto
Per pietà...
Dorilla
Siete vil, non è così?
Zanetto
Siora sì.
Dorilla
Siete indegno di perdon.
Zanetto
Per pietà, per compassion.
Narciso
Orsù voggio fidarme;
(Torna)
gh'ho un per de foleghette ma ben cotte,
voggio che stemo qua tutta stanotte.
Dorilla
Farò quel che comanda.
Narciso
La vegna qua, sentemosse un tantin,
voi contarghe un bel caso.
Dorilla
Io volentieri
l'ascolterò!
Narciso
Giersera un certo bravo
el me voleva far delle bulae,
mi l'ho fatto cangiar
solo con quatro de ste mie peae.
(Dà calci)
Zanetto
Solita so braura.
Narciso
Cossa mai
ghe xe sotto sta tola!
Dorilla
Vi sarà qualche cane.
Narciso
Passa via.
Orsù siora Dorilla
ho pensà de liogarve.
Dorilla
Io sono pronta
a far il suo volere.
Narciso
Olà Narciso.
Son pronto ai so comandi.
Sta signora me xe raccomandada,
voi che la sia logada,
mi no la posso tior
perché son maridà, onde ho ressolto
che ti la sposi ti. La me perdona...
Zitto no replicar se no te coppo.
Ma la dota? La dota
za ghe la farò mi. Cento zecchini
oltre i abiti, el letto e i so manini.
Quando la xe cussì donca la tiogo
ma la fazza che senta
el pensier de Dorilla.
Dorilla
Io son contenta.
Narciso
Va' donca presto a parrecchiar da cena,
mandeme do garzoni
che li voi doperar. Presto la servo.
Mi voggio che stassera
stemo un po' allegramente.
Dorilla
Ella mi va obligando in ogni guisa.
Narciso
(Adesso è 'l bon).
Dorilla
(Io creppo dalle risa).
(Vengono due garzoni)
Narciso
Putti chiappé d'accordo
e porté via de qua sto taolin
perché voggio che femo un bel festin.
Come, cos'è sta robba? Chi è costù?
Questo xe qualche ladro.
Presto ch'el voi coppar.
Zanetto
Ah per pietà la prego a perdonar,
che son el sior Zanetto.
Narciso
Giusto adesso
voggio menar le man.
Zanetto
Ah son in terra,
la tratta da par soo, la me perdona.
Narciso
Cos'estu vegnù a far?
Zanetto
Xe stà l'amor...
Narciso
Ghe vegnirastu più?
Zanetto
No sul mio onor.
Dorilla
A mio riguardo almeno
abbiate compassion di quel meschino.
Questa è sera di nozze.
Narciso
Basta, a riguardo vostro...
Ma senti, se ti torni...
Zanetto
No vegnirò mai più per sti contorni.
Narciso
Orsù voggio andar via
perché se stago qua
no me posso tegnir de fracassarlo.
Fé vu ch'el vaga via,
se co torno lo trovo, ve prometto
che mi voggio de lu far un squazzetto.
(Via)
Zanetto
Oh poveretto mi no gh'ho più fià.
Dorilla
Coss'è signor Zannetto?
Zanetto
Eh che la tasa,
no vedo l'ora de tornar a casa.
Dorilla
Siete molto agitato?
Zanetto
Ah che me sento
andar zo per le calze el mio spavento.
Narciso
Come xella passada?
Zanetto
Oimè Narciso
oimè no posso più.
Narciso
Halla sentio
che ho dovesto per forza
sposarla in so presenza?
Zanetto
Cossa mai vustu far? Abbi pazienza.
Presto meneme a casa,
me voggio far trar sangue.
Prego el ciel che i me tacca al collo un lazzo
se con donne mai più mi me ne impazzo.
Voggio andar da mio sior pare,
domandarghe perdonanza
né mai più vogio morose.
Narciso
E mi arente la mia sposa...
Dorilla
Ed io presso al mio consorte...
a due
Lieta sorte goderò.
Zanetto
Oe Narciso.
Narciso
Mio patron.
Zanetto
Voi parlarte ma iscondon.
Dorilla
Cosa dice?
Narciso
Via tasé.
Dorilla
Vuo' saperlo.
Narciso
El saveré.
Zanetto
Voi l'anello e sie zecchini,
voi la scatola e i manini
e i quaranta ducatelli
che anca ti ti m'ha magnà.
Narciso
Obligado in verità.
Dorilla
Cosa dice?
Narciso
Ch'el ve lassa
quell'annello, quei zecchini,
quella scatola e i manini
che cortese el v'ha donà.
Zanetto
No in mallora.
Dorilla
Obligatissima.
Zanetto
No ghe digo.
Dorilla
Devotissima.
Zanetto
No ghe i dono siora no.
Dorilla, Narciso
Per suo amor li goderò.
Zanetto
Siora voi la robba mia.
Narciso
El mustachi, scampé via.
Zanetto
Dove xello?
Narciso, Dorilla
Eccolo qua.
Zanetto
Scampo, corro.
Narciso, Dorilla
Presto va'.
Fine dell'intermezzo
Testimoni
I-Mb (pp. 44; errore nel titolo corrente: pp. 28-29 «parte terza» in realtà
seconda); partitura d'ignoto (Grove) o di Maccari (Groppo) coeva alla princeps: perduta; Tevernin, IV, pp. 1-40 col titolo La bottega da caffè, commedia; Olzati, IV, pp. 5-44 col titolo La bottega da caffè, commedia; Savioli, VIII, pp. 15-47 col titolo La bottega da caffè, commedia; Guibert: manca; Zatta, XXXV, pp. 289-331 col titolo La bottega del caffè; Prefazione dell'autore alla prima raccolta delle commedie, 1750, in Ortolani2, I, p. 766 col titolo Il caffè.
Sono stati mantenuti
l'alternanza cafè / caffè, strissimo / stissimo "illustrissimo" (Savioli:
«strissimo»), adosso, ehem (bisillabo), halla "hala" "ha" (interrogativo),
quatro, robba, scattola, vertuoso (quadrisillabo), vussignoria, zuccaro passim; 4 galantaria, 8 todesco, 18 pacchietti "pachieti" "manicaretti" (Boerio,
s.v.), 21 protezzion, 24 Ma ghe ne xe qua una; allegramente (accettabile
ipotizzando una dialefe tra «qua» e «una»), 26 Ghe vuol zoette a trapolar
merlotti (accettabile considerando «zoette» trisillabo), 33 facende, 51 babio
"visino" (Boerio, s.v.), 55 riosa "rosa", 97 arrente, 106 solazzo, 114 comandela
cafè? Eh via no femo (accettabile ipotizzando una dialefe tra «cafè» ed
«Eh»), 117 maschereta, 155 colleggio, 162 consiacosaché vermiglia bocca (princeps, Tevernin, Savioli, Zatta; accettabile considerando «consiacosaché»
esasillabico; Olzati: «conciosiacosaché»), 167 avezzo, 177 disolve, 179
frotole, 181 Almanaco, 182 Cacassenno, 197 rabuffato, 206 La la ran la, la la ran ran (ottonario ipermetro o quinario
doppio), 233 e tra le altre cose pelegrine (accettabile ipotizzando una dialefe
tra «le» e «altre»), 295 Moleghe un pochettin, che za l'è ito (accettabile
ipotizzando una dialefe tra «è» e «ito»), 349 forbì sti taolini
(accettabile considerando «taolini» quadrisillabo), 354 avisar, 360 pur
qualche volta i me fa peccà (accettabile ipotizzando una dialefe tra «volta»
e «i»), 375 giarsera "giersera" "ieri sera", 432 pacienza, 508 schietezza, 525
ha domandà de ella (accettabile ipotizzando una dialefe tra «de» ed
«ella»), 531 el dise: «Xe tre ore (accettabile ipotizzando una dialefe tra
«tre» e «ore»), 550 e a far i fatti soi el sarà andà (accettabile
considerando «soi» bisillabo), 613 imbroggio, 628 la vaga cara ella
(accettabile ipotizzando una dialefe tra «cara» ed «ella»), 714 i gh'ha dito
de sì, el vien de suso (accettabile ipotizzando una dialefe tra «sì» ed
«el»), 790 El cognosce anca elo (accettabile ipotizzando una dialefe tra
«anca» ed «elo»), 796 sti atti de umiltà bisogna usar (accettabile
ipotizzando una dialefe tra «sti» e «atti»), 800 qualcosa ancora ella
(accettabile ipotizzando una dialefe tra «ancora» ed «ella»), 803 scimonito,
886 Cossa hoggio da far? Narciso Sconderse presto (accettabile ipotizzando una dialefe tra «Cossa» e
«hoggio»), 909 me raccomando a ella. Dorilla Non temete (accettabile ipotizzando una dialefe tra «a» ed «ella»), 922
sentemosse, 928 Solita so braura. Narciso Cossa mai (accettabile considerando «braura» trisillabo), 938 perché son
maridà, onde ho ressolto (accettabile ipotizzando una dialefe tra «maridà» e
«onde»), 947 parrecchiar, 950 stassera, 953 creppo, 955 e porté via de qua
sto taolin (accettabile considerando «taolin» trisillabo), 977 squazzetto
"sguazzetto", 979 Coss'è, 979 Zannetto, 984 oimè no posso più. Narciso Halla sentio (accettabile ipotizzando una dialefe tra «più» e «Halla»),
1008 annello, 1011 mallora.
Sono stati emendati
150 desmacherada] desmascherada, 283 complimentl] complimenti, 461 Zaa.] Zanetto, 462 Mla] Mia, 645 Furhazzo] Furbazzo, 831 Z n.] Zanetto.
Sono stati emendati
150 desmacherada] desmascherada, 283 complimentl] complimenti, 461 Zaa.] Zanetto, 462 Mla] Mia, 645 Furhazzo] Furbazzo, 831 Z n.] Zanetto.